Shprehu

Pse ekziston

Shumë njerëz kanë diçka që i rëndon dhe s'kanë kujt t'ia thonë pa u ndjerë të gjykuar. Shprehu është bërë për këtë: ta thuash me fjalët e tua, pa emrin tënd të vërtetë, dhe dikush të dëgjon. Shpesh nuk të duhet zgjidhja menjëherë. Të duhet dikush që të dëgjon pa nxituar me këshilla, dhe kaq mjafton që dita të duket pak më e lehtë.

Ku duam të arrijmë

Duam që kushdo që flet shqip, në Shqipëri, në Kosovë apo gjetkë, kur ka nevojë të flasë ta gjejë këtë vend, falas dhe në gjuhën e vet. Edhe kur s'ka njeri online, të gjejë diçka që e ndihmon: ditarin, një ushtrim frymëmarrjeje ose numrat e ndihmës.

Si e mbajmë

• Anonim: askush s'e sheh emrin tënd të vërtetë, as email-in
• Pa gjykim: këtu dëgjohet, nuk jepen leksione
• Pak të dhëna: ruajmë sa më pak dhe e themi hapur çfarë ruajmë
• Për këdo: s'ka rëndësi nga vjen apo me çfarë po përballesh
• Me kujdes: artikujt dhe ushtrimet mbështeten te kërkimet, jo te mendimet tona

Çfarë gjen këtu

Përveç bisedës, ka edhe disa vende të tjera, për ditët kur s'ke qejf të flasësh:

• Bisedë anonime 1-me-1: flet me dikë që ka ardhur për të dëgjuar, pa emra dhe pa histori publike. Biseda zhduket kur e mbyll.
• Ditari, plani i sigurisë dhe modulet: për veten tënde. I sheh vetëm ti.
• Forumi: shkruan ose lexon përvojat e të tjerëve, anonimisht.
• Citatet: fjalë të shkurtra për ditët kur të duhet një kujtesë e vogël.
• Artikujt: shpjegime të thjeshta për ankthin, gjumin dhe tema të tjera.
• Si aplikacion: e shton në ekranin kryesor dhe hapet si çdo aplikacion tjetër.
• Ndihmë e menjëhershme: numrat e krizës për Shqipërinë dhe Kosovën, që hapen edhe pa internet.

Kush qëndron pas projektit Shprehu

Shprehu është projekt i pavarur, jo organizatë dhe jo klinikë shëndetësore. Pas tij qëndron një ekip i vogël që kujdeset për ndërtimin dhe mirëmbajtjen e vetë platformës, jo për ofrimin e terapisë. Askush nga ekipi nuk lexon bisedat e njerëzve; ato mbeten mes teje dhe personit që të dëgjon.

Nëse ke pyetje, vërejtje ose gjen diçka të pasaktë, shkruaj te [email protected].